- Кант
- Скачать: Акафист святой праведной Тавифе Милостивой (pdf)
«Святая праведная Тавифо, моли Бога о нас!»
Величание:
Величаем тя, святая праведная Тавифо, и чтим святую память твою, ты бо молиши о нас Христа Бога нашего.
Акафист святой праведной Тавифе Милостивой
Кондак 1
Яко Спасову небесномудрую ученицу/ и благоутробия Божия одушевленную икону,/ песньми почитаем тя духовными, Тавифо, / ты же яко таиннице доброты богодухновенныя/ умилостиви нам Единаго Благоутробнаго,/ вопиющим ти:/ Радуйся, Тавифо, сосуде, благодати исполненный.
Икос 1
Ангел показалася еси радостотворный, святая, многообразно зде страждущим, сего ради ангельскими тя почестьми Христос Бог достолепно почтил есть, Егоже милостива сотвори вопиющим ти таковая:
Радуйся, любве божественныя сокровищнице.
Радуйся, премудрости вышния гостиннице.
Радуйся, Божию благодать восприявшая.
Радуйся, прелесть разумно оттрясшая.
Радуйся, образе благостыни богатныя.
Радуйся, светильниче божественнаго света.
Радуйся, глубино́ богодухновенных помыслов.
Радуйся, высота обзо́рная деяний святых.
Радуйся, житием своим Христа просла́вившая.
Радуйся, добро́тою просиявшая.
Радуйся, милосердие всем являющая.
Радуйся, и нас любити ближних своих научающая.
Радуйся Тавифо, сосуде, благодати исполненный!
Кондак 2
Воли тщанием совершенныя взоры души твоея к славе Божией простерла еси, и свет веры восприяла еси, темже истинная явилася Христова ученица, Тавифо блаженная, восписующи благих Подателю: Аллилуия.
Икос 2
Благодати исполненная, образом явилася еси во жизни добродетельней и благих сокро́вищнице, евангельская исполня́ющи повеления; темже нраву твоему божественному дивящеся, воспеваем ти сице:
Радуйся, закона Христова исполнительнице.
Радуйся, державы вражия низложительнице.
Радуйся, образе жития добродетельнаго.
Радуйся, исполнение глаголов животворных.
Радуйся, огнь носящая благодати божественныя.
Радуйся, имущая в душе свет невещественный.
Радуйся, лозо́ благоплодная винограда живоноснаго.
Радуйся, жено небесномудрая и богоприятная.
Радуйся, яко Бога человеколюбию последила еси.
Радуйся, яко диавола человеконенавистничество омерзила еси.
Радуйся, бесплодныя суеты нас отвращающая.
Радуйся, к свету спасительному обращающая.
Радуйся, Тавифо, сосуде, благодати исполненный!
Кондак 3
Немощных и страждущих врачевала еси, крепость от сердца твоего изливавши обильно, Христа сими прославляя, безсмертныя сподобилася еси от Того славы. Темже убо невещественно воспеваеши ныне человеколюбивому Богу: Аллилуия.
Икос 3
Возсияла еси во Иоппи́и дарами божественными, Тавифо богомудрая блаженная, Христове Церкви жития твоего лучи простерши, сими же и мы просвещеннии обрадованно вопием ти:
Радуйся, сердце милостивное имущая.
Радуйся, утешение всем подающая.
Радуйся, души́ недуги исцеляющая.
Радуйся, верным во всем помогающая.
Радуйся, милости точащая струи́.
Радуйся, ангельским ревнующая чином.
Радуйся, серною нарицаемая.
Радуйся, крине неувядаемый.
Радуйся, яко тебе ради процвела Иоппи́я древняя.
Радуйся, яко доднесь почитают тя иоппи́йстии людие.
Радуйся, яко к заступлению твоему прибегают.
Радуйся, яко молитв твоих испрошают.
Радуйся, Тавифо, сосуде благодати исполненный!
Кондак 4
Умершую тя, плачущим Петр первоапостол живою представи, честная Тавифо, жительства твоего достоинство всем являя, с тобою Христу Спасу вопиющим: Аллилуиа.
Икос 4
Во Иоппию пришедый иногда воздвигл тя есть Петр повелением вся Творящаго, темже возрадовался убо зело есть, приемля тя жи́ву, честная, с ним же молися, милостивая, о воспевающих сице:
Радуйся, освященная Богом Словом.
Радуйся, своим сияющая житием.
Радуйся, закону естества бывшая яко мертвенная.
Радуйся, воскресшая словом веры.
Радуйся, паки на земли пожившая.
Радуйся, паки же милосердием своим всем послужившая.
Радуйся, временным успением твоим миру явле́нная.
Радуйся, испрошающая тому милостивно спасение.
Радуйся, яко силу любве светозарно явила еси.
Радуйся, яко Духа сияние прияла еси.
Радуйся, апостолом воздвигнутая от одра смертнаго.
Радуйся, яко призре Господь на молитву верных.
Радуйся, Тавифо, сосуде, благодати исполненный!
Кондак 5
Сострастием твоим и милостями богатными поработала еси, щедрая, Начальнику милости, служительница Того преславная и апостолов сподвижница явилася еси, яко славная ученица, Тавифо, вопиющи к Богу: Аллилуиа.
Икос 5
Верою твоею святою и любовию совершенною, Тавифо, Спасу Иисусу приблизилася еси, и Того преславная исполнительница показалася еси заповедей. Тех же светлостию просвети убо благоговейно поющия ти:
Радуйся, лампадо светлосия́тельная.
Радуйся, божественной благодати орга́не.
Радуйся, Спасова богодухнове́нная служительнице.
Радуйся, апостолов святых сподвижнице.
Радуйся, фи́никсе благотворения многоплодный.
Радуйся, свире́ле милосердия сладкозвучная.
Радуйся, ниво, плодящая нравы благия.
Радуйся, саде, растящий дарования святая.
Радуйся, целомудрия вдовиц утверждение.
Радуйся, водительство благостынное нищих.
Радуйся, многих труды облегчающая.
Радуйся, стена́ния душевная пресекающая.
Радуйся, Тавифо, сосуде, благодати исполненный!
Кондак 6
Проповедницами не токмо во Иоппии, но и во всей Церкви честней людие явишася, щедротами твоими, Тавифо, уте́шеннии, имя Христово прославляюще, вопиюще с тобою вкупе: Аллилуиа.
Икос 6
Искупление вечное во Христе обретшая и Кровию Его Честною освященная, искупи в лишениях сущих рукама твоима щедрода́тельныма, о всечестная, стенящих в нуждах, обаче же паки со упованием восклицающих:
Радуйся, небесное приявшая богатство.
Радуйся, обильно от него всем подающая.
Радуйся, сердец преогорченных веселие.
Радуйся, скорое вдовиц посещение.
Радуйся, печали разрешительнице.
Радуйся, благодати раздаятельнице.
Радуйся, яко обе ру́це в милости простираеши.
Радуйся, яко пламень нуждный угашаеши.
Радуйся, образ Божий в каждом усмотряющая.
Радуйся, сердца твоего и от нас не отвращающая.
Радуйся, скорбей житейских отгнание.
Радуйся, душ наших упование.
Радуйся, Тавифо, сосуде, благодати исполненный!
Кондак 7
Содейственница явльшися учеником Спасовым, просвещения истиннаго Божественнаго испо́лнилася еси, и миру Христова показалася еси ученица, целомудренно житие твое исправльши, Тавифо, Богу вопияше: Аллилуиа.
Икос 7
Непорочным житием твоим, закона исполнением евангельскаго, благоплодная явилася еси в доме Божии маслина, яко же Давид провозгласи, богомудрая, елеем трудов твоих веселящая всех, тебе вопиющих:
Радуйся, благодати Божественныя гобзова́ние.
Радуйся, вражескаго обмана попрание.
Радуйся, носительнице духа евангельскаго.
Радуйся, свиреле законов богоданных.
Радуйся, цвете благоуханнейший закона духовнаго.
Радуйся, сосуде, таинственнаго преисполненный веселия.
Радуйся, яко добродетели деяньми изобилуеши.
Радуйся, яко внутренняя сокровища твоя являеши.
Радуйся, яко житие твое честно совершила еси.
Радуйся, яко талант свой преумножила еси.
Радуйся, ничесоже себе искавшая.
Радуйся, единому Богу работавшая.
Радуйся, Тавифо, сосуде, благодати исполненный!
Кондак 8
Сродником же и странным и всем труждающимся многочастне послужила еси, темже тя, милостивую, Христос Бог почти Премилостивый святости дарованием. Ему же воспеваеши присно: Аллилуиа.
Икос 8
Иже и в раи сияющая благоутробия светлостию и нравы братолюбными, к Богу преставльшаяся в радости, Тавифо всеблаженная, яко Божия причастница прославилася еси. Сего ради и мы, недостойнии, воспеваем ти сице:
Радуйся, ангелов спребывательнице.
Радуйся, лик святых сопричастнице.
Радуйся, светлость Христову созерцающая.
Радуйся, от плодов древа жизни вкушающая.
Радуйся, улучившая от славы преестественныя.
Радуйся, по́чести нетленныя сподобльшаяся.
Радуйся, дарами многоразличными блистающая.
Радуйся, Господеви нас привождающая.
Радуйся, наследнице вечныя радости.
Радуйся, причастнице райския сладости.
Радуйся, яко о почитающих тя Христа умолявши.
Радуйся, яко тех упование не посрамляеши.
Радуйся, Тавифо, сосуде, благодати исполненный!
Кондак 9
Веры деяньми божественно украсившися яко же любве сокровищнице, небеснаго благаго избрания причастницею явилася еси, Тавифо преславная, Того же избрания молитвами твоими и нас сподоби вопиющих: Аллилуиа.
Икос 9
Потоками твоея милости напои́ иже во глубоцей нужде люте жаждущих, Тавифо, понеже, яко источниче сострадательных словес, сладостию глагол твоих уте́шительных изымавши от всякия скорби тебе вопиющих:
Радуйся, доброт душепита́тельных неистощимый источниче.
Радуйся, небесных добродетелей богосия́нный столпе.
Радуйся, рук твоих умением присных удивлявшая.
Радуйся, от трудов твоих ризами их одеявшая.
Радуйся, алчущих насыщение обильное.
Радуйся, печальных сострадание тихое.
Радуйся, многих уста утешения.
Радуйся, нагих одеяние спасения.
Радуйся, толкующим отверзающая.
Радуйся, просящих мудро обогащающая.
Радуйся, никоего́ждо неутешным оставляющая.
Радуйся, дары божественныя нам подавающая.
Радуйся, Тавифо, сосуде, благодати исполненный!
Кондак 10
Во смирении глубоце дела́ милосердия творила еси, от самых лишь близких зна́емая. Обаче же Сердцеведец Бог тя прослави, да не скрыется светильник под спудом, но светит всем, добрыми делами своими прославляющи Отца Небеснаго: Аллилуиа.
Икос 10
Жития твоего, Тавифо, славу, аки крин белый венца цветонеувядаемаго Иисусова, Лука являет нам богомудрый боговещательно. Темже общее уверяя всех воскресение о тебе, со одра смертнаго воздвигнутой, радующихся:
Радуйся, света небеснаго светильниче.
Радуйся, о́бразе жития добродетельнаго.
Радуйся, Христова ученице, сосуде благодати.
Радуйся, яко поставлена в Церкви Его сняти.
Радуйся, преисполненная небесных дарований.
Радуйся, избавленная нечаянных искушений.
Радуйся, непорочно во Иоппии пожившая.
Радуйся, ангельскому житию поревновавшая.
Радуйся, внутрь славу имущая, яко дщерь царе́ва.
Радуйся, Божией Матери ревнующая в доброделании.
Радуйся, Христово благоутробие приклоняющая.
Радуйся, силу любве кре́пльшую смертных уз являющая.
Радуйся, Тавифо, сосуде, благодати исполненный!
Кондак 11
Песнь благодарственную Спасови, источник сострадания тебе даровавшему, приношаху иоппийстии людие, на всяк день благодеянии твоими напаяемии, Тавифо богоблаженная, воспевая с тобою вкупе: Аллилуиа.
Икос 11
Света незаходимаго приснозрительнице, от здешних к славе нетленней преставльшаяся, Тавифо сиятельная, и Сиона вышняго великолепием наслаждающаяся, молися о нас, вопиющих ти таковая:
Радуйся, яко в скинию вселилася еси Света умнаго.
Радуйся, яко сподобилася еси Христова сияния.
Радуйся, яко сладость любве источавши.
Радуйся, яко прелести горечь разорявши.
Радуйся, от имений своих всечудная раздаятельнице.
Радуйся, сокровищ нетленных всечестная стяжательнице.
Радуйся, ученик Христовых собеседнице.
Радуйся, верных Тому посреднице.
Радуйся, Троицу присно прославляющая.
Радуйся, спасение нам испрошающая.
Радуйся, яко тобою от падений избавляемся.
Радуйся, яко к Богу тобою привождаемся.
Радуйся, Тавифо, сосуде, благодати исполненный!
Кондак 12
Со святых лики и со ангелы присно радующися, святая блаженная Тавифо, непреходящею о Бозе радостию, молися убо и о еже избавитися нам от всякия скорби душевныя. Яко да и мы славословити Бога в радости и воспевати сподобимся: Аллилуиа.
Икос 12
Хва́ляще воспеваем твоих, Тавифо, совершенств богатство. Но ро́су благоутробия Божественнаго и на нас свыше испроси, умилостивляющися о нас грешных, тебе вопиющих:
Радуйся, селений вышних служительнице.
Радуйся, предстательнице наша и попечительнице.
Радуйся, апостолов славных спребывательнице.
Радуйся, истинной радости причастнице.
Радуйся, милосердия небеснаго богатство неистощимое.
Радуйся, и моя у Бога ходатаице непостыдная.
Радуйся, всякия беды отвращающая.
Радуйся, за всех Христа умоляющая.
Радуйся, душевную очищающая скверну.
Радуйся, славу зрящая Божию.
Радуйся, верных принимающая пение.
Радуйся, испрошающая нам спасение.
Радуйся, Тавифо, сосуде, благодати исполненный!
Кондак 13
О богомудрая святая Тавифо блаженная, ученице Христа богоносная, приими наше пение сие яко приношение посильное, и ущедри ны от даров милости твоея, да Богу вопием вси: Аллилуиа.
(Сей кондак поется три раза, а затем икос 1 и кондак 1)
Молитва
О блаженна еси, святая Тавифо, возросшая в винограднице Христове, он же и есть Церковь Божия. От лозы истинныя Иисуса Сладчайшаго почерпла́ еси божественныя токи благодати, ими же уплодоносилася от земли́ к Небесным. Яко грозд винный, напита́й нас и увесели подражанием тебе в добрых делах, да сподобимся неизреченных благ. Проповедаше сице Господь: «яко аще зерно пшеничное, павше в землю, не у́мрет — еди́но пребывает, аще же у́мрет — сотворит плод изобильный». Успение твое, Тавифо, явися плодоносно не токмо твоея добродетели ради — сия же ныне во услышание Церкви всей явися яко образ достоподражательный многим — наипаче сие сотворися во утверждение веры Христовы, отверзающей человеком райския двери: да сочетаваются Небесная с земными. Мы же, в добродетелех оскудевшии, молитв твоих ко Всещедрому просим: да спасет и помилует души наша, мирови же подаст мир и велию милость. Днесь собори верных ликовствуют, прославляюще величие добродетели, еже яви Господь в житии Святей Своей ученицы, кая процвела яко финикс, приумноживши таланты Господни. Испроси, о Тавифо, ублажающим тя оставление прегрешений. Аминь.
Тропарь праведной Тавифе, глас 4
Днесь вера Христова утверждается каменем веры, / и ликовствует в веселии Иоппия, / псаломски славословят Жизнодавца Сына Божия вернии, / видяще совершаемо велие чудо: / первоверховный апостол глаголет, / и умершая востает от гроба, / юже Низложитель смерти дарует Церкви, / да украшаются во образ ея добродетельми люди. / Приидите убо, христиане, / принесем ко святей моления наша: / блаженная Тавифо и милосердная, / вознеси наша воздыхания Пресвятей Троице / и молися со дерзновением, /да сынове Света Превечнаго будем, / да сподобимся Божия милости, / да пребываем в любви Божественней, / и да царствует мир во вселенней.
Кондак праведной Тавифе, глас 4
Ужасахуся иоппи́йстии людие / и дивляхуся ангели Божии,/ егда исцеливый Еннея / воззва мертвых серну нарицаемую,/ милосердием приукрашенную,/ о ней же к нему взываху вдовицы неимущия./ И ныне, Тавифо Блаженная,/ услыши моления наша, к тебе приносимыя,/ и испроси у всяческих благ Подателя/ милости и щедроты верным Его,/ да, блажаще Тя, вопием ти:/ радуйся, добродетели / нас научающая.
Из деяний Святых Апостолов (Глава 9, стихи 36-43)
36. В Иоппии находилась одна ученица, именем Тавифа, что значит: «серна», она была исполнена добрых дел и творила много милостынь.
37. Случилось в те дни, что она занемогла и умерла. Ее омыли и положили в горнице.
38. А как Лидда была близ Иоппии, то ученики, услышав, что Петр находится там, послали к нему двух человек просить, чтобы он не замедлил придти к ним.
39. Петр, встав, пошел с ними; и когда он прибыл, ввели его в горницу, и все вдовицы со слезами предстали перед ним, показывая рубашки и платья, какие делала Серна, живя с ними.
40. Петр выслал всех вон и, преклонив колени, помолился, и, обратившись к телу, сказал: Тавифа! встань. И она открыла глаза свои и, увидев Петра, села.
41. Он, подав ей руку, поднял ее, и, призвав святых и вдовиц, поставил ее перед ними живою.
42. Это сделалось известным по всей Иоппии, и многие уверовали в Господа.
43. И довольно дней пробыл он в Иоппии у некоторого Симона кожевника.
Евангелие от Матфея, зачало 104 (Глава 25, стихи 1-13)
Сказал Господь такую притчу: подобно будет Царство Небесное десяти девам, которые, взяв светильники свои, вышли навстречу жениху. Из них пять было мудрых и пять неразумных. Неразумные, взяв светильники свои, не взяли с собою масла. Мудрые же, вместе со светильниками своими, взяли масла в сосудах своих. И как жених замедлил, то задремали все и уснули. Но в полночь раздался крик: вот, жених идет, выходите навстречу ему. Тогда встали все девы те и поправили светильники свои. Неразумные же сказали мудрым: дайте нам вашего масла, потому что светильники наши гаснут. А мудрые отвечали: чтобы не случилось недостатка и у нас и у вас, пойдите лучше к продающим и купите себе. Когда же пошли они покупать, пришел жених, и готовые вошли с ним на брачный пир, и двери затво-рились; после приходят и прочие девы, и говорят: Господи! Господи! отвори нам. Он же сказал им в ответ: истинно говорю вам: не знаю вас. Итак, бодрствуйте, потому что не знаете ни дня, ни часа, в который приидет Сын Человеческий.
Икона святой Тавифы посетила Тюбинген в 2010 году